„Ромски здравствен медијатор“ е една од клучните програми за унапредување на здравствената заштита на Ромите, која ќе продолжи да се спроведува и во текот на наредната година. Во 2013 година, ромските здравствени медијатори посетиле 4.125 Роми и обезбедиле вкупно 4.729 услуги, а медијаторите биле препознати и добро прифатени од локалната заедница.

Ова се некои од заклучоците од национална конференција посветена на здравјето на Ромите, која ја организираше Министерството за здравство и невладината организација ХЕРА, коишто ја спроведуваат програмата.

Во ХЕРА ја истакнуваат потребата од континуирано запознавање на ромската заедница  со здравствените и социјалните права, со цел да можат полесно да ги остварат. 

За унапредување на здравјето на Ромите неопходно е да се активира и локалната самоуправа во заедничка соработка со граѓанските организации, здравствените медијатори, како и локалните здравствени и социјални институции, додаваат од ХЕРА.