Минатата година во земјата се евидентирани сериозни нарушувања на слободите и правата на граѓаните, како и драстични повреди на принципот на владеење на правото и правната држава.

Загрижувачки е податокот дека регистрираните повреди на човековите права и слободи укажуваат не само на системски проблеми во функционирањето на органите и институциите, туку и на злоупотреба на нивните надлежности.

Ова е генералната оценка од Годишниот извештај за состојбата со човековите права во Македонија во 2013 година, што го подготви Хелсиншкиот комитет.

Годишниот извештај претставува сублимат на анализи за констатираните состојби со човековите права во областа на судството, законодавството, полициското постапување, затворените установи, дискриминацијата, кривичните дела сторени од омраза, економските и социјалните права, граѓанските и политичките права и слободи, како и правата на ЛГБТИ заедницата.

Меѓу другото како главни проблеми во Извештајот се посочуваат: повредата на пресумпцијата на невиност; праксата на изрекување на колективни, идентични и стереотипни, решенија за притвор; случаите на полициска тортура; дискриминацијата врз основа на политичка, етничка и родова припадност, како и според припадност на маргинализирани групи; големиот број на кривични дела сторени од омраза; прекршувањата на правото на социјална и здравствена заштита; повредите на правото на здружување и слободата на изразување итн.

Целосните информации за состојбата со човековите права во 2013 година може да ги прочитате во Годишниот извештај достапен на следниот линк.